Hamdy Zaydane / Egipto
حمدي زيدان / مصر

من مناخاته الشعرية

مش قلتلك
\' ربنا بيحب قصايدنا \'

صدّقت بقى
إنى مؤمن قوى بالكتابة ؟
يونيو
2004
إسكندرية

آخرة

إتأخرت على قوى
وفوّت عشانك كام زفـّة ملايكة ، ومواكب مؤمنين
وانت رايق ولا همّك
وجايلى سكران طينة ف لانشك الورق
والملايكة السمر جارّين بناتك من شعورهم
البنات اللى سيّحت دمهم ف حواديتك المستورة
وفضحتهم بعزلتك وصيامك
اللى ضمنلك جنة مفروشة
مش ح يعتـّبها غيرك
يونيو 2004 اسكندرية

صليب ألوميتال

معدن بارد
ودمّ سخن
مش خسارة ؟

مش لو شباك كان أجدع يبتدى منه عيل صغير نظريته المحندقة فى الكون
أو تندة يتدارى تحتها اتنين حبّيبة ويخطفوا بوسة م السقعة
أو باب جرّار يحبس المزيكا وريحة البراندى والحوارات الدافية
قبل ما نسلم عليه ويفوقنا الـ last order
أو عشّة فراخ حداثية لطيور هجت م القصايد
وهاجت على بنات أفكارنا
بذمتك ... مش حرام ؟
يونيو 2004 اسكندرية

ميكروباص

ما تزعلش منى
لو ألّست عليك وانت بتعيط وخايف
أو هزّأتك وانت بتضحك وناسى
كل اللى كان قصدى إنك تاخد بالك منى شوية
لإنك ح تنزل قبل منى
وتسبنى لوحدى وقت طويل
ألم الأجرة ، وافتح الباب وأقـفله
واطمّن الركاب اللى نزلوا ،
واطبطب ع الكراسى الفاضية
واوشوش الشبابيك اللى بتبربش م الرجفة
واوصى السواق اللى بيفكر ح ينبهك ازاى
قبل اللجنة اللى جاية
يونيو 2004 اسكندرية

الصلاة خير من النوم

قنبلة بفروة ناعمة
بتتدحرج slow motion قدّام عنيك
ممكن تنورلك طريقك وانت نازل تصلى الفجر
وصوت انفجارها ح يسيح ف الآذانات
اللى بتطلقها خمس ميكروفونات hi fi تحية لنزولك
ويغطرش على وسوسة الشياطين الكاجوال اللى بيترقّـصوا حواليك
وتفرتك البنات اللى ح ياكلوك بعنيهم ف عرض ستربتيز مستمر طول السكة
وانت راجع .... ما تستغربش إن عدد الجزم قدام باب الجامع أكتر من عدد المصلين اللى نالوا الشهادة وما شافوش حاجة م اللى انت شوفتها
اسكندرية يونيو 2004

رصاصة فى القلب

هى جت فيك ؟؟
معلش
ما انت منشّن على م الصبح
وعاملنى هدف كارتون
بينطّلك فى الضلمة ويفزعك
والغريبة إنه من شوية كان إشارات بتدلك ع البيت
وحمام بتصطاده مشوى بنظرة عين
وقميص واقى م الرصاص والبرد

بطّل مهرجان الرعب ده
وفرحك الطفولى بالألعاب النارية
واسمحلى برصاصة الرحمة
أو سبنى اعزمك على فيلم تانى خالص
مفهوش وتر حسّاس ولا ألغام ولا آيس كريم ف عز البرد
ولا قتل خطأ
يونيو 2004
اسكندرية

طبيعة صامتة

نظرة عنيك لوحدها حرقتلى قميصى الدبلان
وانا كل اللى عملته انى سبتك تنام والنضارة فوق وشك
عشان تشوف احلامك net ، بدال ما تدهس فى حلم تانى أبعد
وف عز حلمك الملحوس بألوان فرايحى – ح تسيح ف أول دش دموع –
دخّـلتلك لون سخن يدفـّى فرشتك ، ويطرّى فرشتك الصلعة
وكنت متعشم فى أرضيتنا المشتركة ، والإطار المتين المدهب اللى محاجى على صورتنا سوا ، والخطوط الناعمة اللى ما بتتقطعش
قمت سايق فيها وحفـّيت من تفاصيلى وعملت حواديتى طبيعة صامتة ونسيت إنها ممكن تصرّخ فى وشـّك ، وسلـّمتنى للحظة الباردة موديل عارى من أىّ مقاومة تسرح بعنيها على جلدى وبخيالها تلغوص ف قلبى وهى بتدوّر على نقطة حمرا تونّسها وتقربها من مركز اللوحة
مخضوض ليه بقى ؟!
وانت واقف قدام مجزرة ألوان وجسم عريان وقلب مفتوح ودم سايح وخجل عرقان
تعرف دلوقتى ترسمنى – بنفس – م الذاكرة ؟؟
يونيو 2004 اسكندرية

Biografia
°°°°°°°°°°
Hamdy Zaydane / Egipto
حمدي زيدان / مصر

الشاعر المصري حمدى زيدان عبد السلام زيدان
من مواليد الاسكندرية 1 / 1 / 1973
المؤهلات
ليسانس الحقوق – جامعة الإسكندرية 1994
دورة المعهد العربى لحقوق الإنسان – الخاصة باستخدام مواثيق حقوق الإنسان فى الدفاع / اتفاقية حقوق الطفل نموذجا – القاهرة 1999
دورة المعهد العربى لحقوق الإنسان فى إعداد تقارير الظل ومراقبة حقوق الإنسان – بالتعاون مع مؤسسة كونراد إديناور القاهرة 2002
دورة البرنامج العربى لنشطاء حقوق الإنسان – والخاصة بالتعليق والتفاعل مع قانون الجمعيات الأهلية لعام 2002 الإسكندرية 2004
دورة مركز دعم المنظمات غير الحكومية - فى التخطيط الإستراتيجى وإدارة المؤسسات الأهلية
العديد من الدورات التدريبية الأخرى المتخصصة بنشطاء العمل الأهلى وحقوق الإنسان.
الوظائف
محامى محترف ومستقل من 1994 حتى 2000
محامى وناشط حقوقى وباحث بجمعية المساعدة القانونية من 1996
سكرتير تحرير مجلة العهد الآتى والتى تصدر من جمعية المساعدة القانونية لحقوق الإنسان فى الفترة من 2001 حتى 2004
مدير ومنسق مشروع إنشاء المكتبة الحقوقية والقانونية بجمعية المساعدة القانونية و توفير قاعدة بيانات والعمل على نشر ثقافة حقوق الإنسان بين غير المختصين والنشطاء
المسئول عن النادى الثقافى والسينمائى بجمعية المساعدة والذى يعمل على عرض وإنتاج الأفلام الروائية والقصيرة والتسجيلية والوثائقية المتعلقة بحقوق الإنسان وموضوعاتها، وإقامة الندوات الفكرية والفنية و الحلقات النقاشية، فى إطار نشر ثقافة حقوق الإنسان والتضامن مع ضحايا الانتهاكات باستخدام الفنون والوسائط الثقافية والفنية
مدير وحدة التوثيق والمعلومات بجمعية المساعدة القانونية لحقوق الإنسان من 2001 وحتى 2004
محرر و معد المادة الخاصة بالموقع الإلكترونى لجمعية المساعدة القانونية لحقوق الإنسان
رئيس تحرير النشرة الإلكترونية لحقوق الطفل والخاصة بجمعية المساعدة القانونية لحقوق الإنسان
مدير تحرير النشرة الداخلية والخاصة بالعاملين بجمعية المساعدة القانونية لحقوق الإنسان
مدير وحدة التوثيق المرئى بجمعية المساعدة القانونية لحقوق الإنسان
منسق العلاقات دولية والمشروعات و التمويل بجمعية المساعدة القانونية لحقوق الإنسان
منسق العلاقات الدولية والمشروعات والتمويل بجمعية بلدى لتنمية الديموقراطية
الخبرات
عضو مؤسس بجمعية المساعدة القانونية لحقوق الإنسان
عضو بمنظمة العفو الدولية
تنظيم اللقاءات والمؤتمرات و ورش العمل
المشاركة فى تنظيم الحملات و الدعوة
المشاركة فى إعداد وصياغة التقارير الدورية
المشاركة فى تكوين وتفعيل شبكات الاتصال والإعلام بين المنظمات والهيئات والأفراد
كتابة الأغانى لبعض المطربين المستقلين والفرق الموسيقية المستقلة بالإسكندرية والقاهرة، منها ما صدر فى ألبوم بالأسواق
المشاركة فى تأسيس عدد من الفرق المسرحية والغنائية أو المشاركة فى أعمالها ومنها: فرقة الصحبة للمسرح والفولكلور، فرقة المسرح الطقسى، فرقة المسرح الشعبى [ مسرحنا ] ، فريق الحب والسلام، فريق الرفاق وخالد شمس، فريق أمواج للموسيقى والحكى
مؤسس لجمعية إسكندريلا للثقافات والفنون بالإسكندرية / تحت التأسيس
عضو لجان التحكيم الشعبية بالعديد من المهرجانات المسرحية للهواة
المشاركة فى فعاليات العديد من المهرجانات المسرحية بهيئة قصور الثقافة، و مهرجانات نوادى المسرح&#