Said 
BELGHERBI 

WADJ-AYI-D TIFRAS-INU!

X trict n tâejjuja,
Ghari tammurt,
Ghari turja.
D tireqqaghin tizadjitin-inu
Am tayri,
Yenduqma daysent uraji,
Itteffegh-d d tihjijjatin
Deg dammen-inu,
Tin tareddef tin!
Izdegh umezruy
X tmewwa ujemmad'-inn,
Isriwriw d ighuyyan
Ifessi tizermin
Itedjem deg wussan
Isrugha tifawin.
I tudart yettun, ad inigh:
A day-i tari
S taycitin
Ad ayi-tsezdegh
Jar imar-nnes
D aydud
War yareccin.
I yitri yettwattun, ad cetcigh:
Ad iwarda
Tifras-inu
I yires n tsemghin
Ad dayi idarent d izri
Deg irimam d tiqessisin
Ad yaf tansa-inu
War ghares bu texxamin
Ad t-yaf d iseqsan
Uyren ghar twafitin;
Ad yessen imar
Dhigh d tiweddarin
Ad t-yefsar d iwaren
D icetcan
X yimi n tinawin.

Tarraguna di 04-07-2007

DHAR UBARRAN

Ay a Dhar Ubarran!
Ay iyyar n umenghi!
Tezdegh dayek tudart
S ibeh'rar n unuri.

D cek d ayi-yejjin
Ttarigh s uriri.
Ad arigh amezruy-
Nnec war ighedji.
Ma t-arigh s rxad'ar?
Ma t-zemmegh s umenghi?
Ad ac-inigh: Uyar-d
Ra d cek ari-ayi!
Siwer-d x tidet
Deg irimamen tarwi!
Ciyyar-d s idammen
D ac-isseswen dmani!
Sriwriw-d s yires
Xak yisin tarz'ugi!
Fad'ma gharek tus-d
S tidurin n ughi,
Tarzef-d d inexsisen
Yudumen d araghi.

Ay a Dhar Ubarran!
Ay a sendef dayi
Aymar ucar-nnec!
S taryazt zi yifri,
Faryent s yiwaren
S uya d yenni
Xebcen-anegh udem
Di tudart war nettiri,
Sfed'ren tid'ewdin
H'uma war cek nettari;
Arz'in rxezrat
S rh'ezran war nettwiri.

Ay a Dhar Ubarran!
Mani cek ghar nawi
Mani?
A cek-nidar d twafit
Tweddar war tt-nufi,
A cek-neghnes d ayezzim
D asendef i yenneghni.

Ad as-inigh i Temsaman:
Twangit war tmetti!
Ad as-inigh: A wetcma,
Rubigh, ruba akidi!

AZ'RI N WAWAR

Zi tlullucin,
Zi tqessisin,
Tudart turem-am dfin
Tyared'-it d fad.
I usinu deg metni yeswin
Yessusef-it d rebhut
Yettwaghen x twetmin.
Az'ri-nnem d reâwitc
X yexf n td'ewdin.
Urigh zzayes tinfar
D rfadj i trewriwin,
A zzaysent ccuregh ur
Ineddun di tghufawin,
A zzaysent remdegh isuraf
D tiwsi i tin d win.
Az'ri n yires-nnegh
Yesrufa i tiwarin;
Zeg mezruy ittudum
D tament n teghrasin.

TAMEDDURT:

Ilul Said BELGHERBI di Dar Lkebdani di Nnad'ur deg ugafa n Merruk. Netta d amedyaz u d amyaru amazigh, issafegh-d sin n ammud-en n tallasin umi igga d azwel [ASWAD' IBBUYEBH'EN], adlis d-iffghen di 2006, d [ASFIDJET] d-iffghen di 2008.
Ikka iga amaslad' di tmesmunt Ayt Sâid i Yidles d Tneflit di Merruk. Illa akud-a d amaslad' di tmesmunt n Yimazighen di Kat'alunya di Seppanya. Iga imes'ki n Umuni n Yinseblugen Imazighen di Intirnit.

Tansa-nnes: [E-mail] said_belgharbi@yahoo.es
http://www.isuraf.jeeran.com/said

BIOGRAPHIE :

Né à Dar Elkebdani près de Nador au Nord du Maroc, Said BELGHARBI est poète et écrivain amazigh. Il a publié un recueil de nouvelles intitulé [ASWAD IBBUYEBHEN] en 2006, y [ASFIDJET] en 2008. Il a été membre de l'Association Ait Said pour la Culture et le Développement au Maroc. Actuellement, il est membre de l'Association des Amazighs de Catalogne en Espagne. Il est le fondateur de l'Union des Bloggueurs Amazighs sur le net.

said_belgharbi@yahoo.es